Открив цел нов свет кој никој претходно не го видел.
И планини поместив, пустини наводнав и мориња исушив.
Ѕвезди избројав, бездни ископав, ветрови пренасочив.
Открив нови чувства, многу повозвишени од овие земните.
Танцував со демони, со ѓаволи, со духови.
Безделничев со ангели и архангели.
Ја научив смислата на животот и миг подоцна ја заборавив.
За прв пат во животот премолчив зборови, а сепак искажав чувства.
Пливав со феникси, летав со сирени.
Пишував песни, веќе милион пати напишани, секогаш различно.
Живеев, умирав, се давев, се гушев… Постоев.
И плачев, и се смеев, и сонував, и болев. Запомнав се што заборавив.
Низ мене течеше живот, наместо крв. Испумпан од поривот да постојам.
Место срце имав дупка, место разум имав пеперутки, место здив имав опиум.